Инспектори во „посета“ на трговците поради цените

Државниот пазарен инспекторат направи 5.155 надзори во периодот од 23 до 27 март, информира претседателката на инспекциски совет, Магдалена Филиповска-Грашкоска, на денешната прес-конференција во Владата.

Покрај контролите на угостителските локали, Пазарниот инспекторат ги контролира и замрзнатите цени на одредени производи. Во соработка со УЈП направени се 928 надзори на цените, при што кај повеќе од 60 отсто трговци е утврдено покачување на цената, особено на лимоните и соодветно е постапено.

Констатирано е дека има неосновани пријави за зголемени цени кај одредени трговци, па апелираме да се пријавуваат реални случаи, рече Филиповска-Грашкоска. 

Трудовиот инспекторат, пак, во околу 700 надзори што ги направил издал 13 решенија и 48 укажувања за работодавачи кои не ги почитувале препораките за превенција на Владата и не го организирале работењето според нив.