БиХ: Пораст на цените за 3,3%

Цените на производите и услугите за лична потрошувачка во Босна и Херцеговина, мерени преку индексот на потрошувачките цени, во јануари се повисоки за 1,4 отсто во однос на претходниот месец, додека годишната инфлација изнесува 3,3 отсто, објави Агенцијата за статистика на БиХ.

Храната и безалкохолните пијалоци во јануари се во просек поскапи за 2,2 отсто од декември лани, алкохолните пијалоци и тутунот за 0,8 отсто, домувањето и комуналните услуги за 1,6 отсто, мебелот, апаратите за домаќинство и редовното одржување на домот за 0,8 отсто.

Здравството поскапело во просек за 2,2 отсто, превозот за еден отсто, рестораните и хотелите за 0,3 отсто, рекреацијата и културата за 0,1 отсто, образованието за 0,6 отсто, а останатите стоки и услуги за 0,6 отсто. Во јануари, во однос на претходниот месец, облеката и обувките во просек поевтинуваат за 3,9 отсто. Нивото на цените во јануари годинава било за 3,3 отсто повисоко од истиот месец лани, пренесува „БХРТ“.

Храната и безалкохолните пијалоци во јануари во однос на истиот месец од 2024 година се во просек поскапи за 6,3 отсто, алкохолните пијалоци и тутунот за 4,3 отсто, станбените и комуналните трошоци за 0,8 отсто, а здравствената заштита за седум отсто. Комуникациите се во просек поскапи за 0,3 отсто, рекреацијата и културата за 3,4 отсто, образованието за 0,5 отсто, рестораните и хотелите за 7,1 отсто, а останатите стоки и услуги за 3,4 отсто.

Просечниот пад на цената е забележан кај облеката и обувките за 8,7 отсто, мебелот, апаратите за домаќинство и редовното одржување на домот за 0,4 отсто и превозот за 0,2 отсто.

Извор: Biznis.ba

Фото: Pexels