Африканска свинска чума потврдена во 32 општини во Србија

Србија може да остане со драстично намалено производство на свинско месо доколку не стивне заразата со африканска свинска чума која со сѐ поголем интензитет се шири во српските фарми.

Болеста е потврдена на 1. 154 фарми во 32 општини, соопшти Министерството за земјоделство, шумарство и водостопанство. Според министерството, африканска свинска чума се појави на околу 150 фарми и дека случаи се потврдени во Војводина, Белград, централна и источна Србија.

Досега на фармите се извршени 314. 042 контроли, а до петокот еутаназирани се околу 18. 000 свињи.

Ненад Будимовиќ, доктор ветеринар и секретар на Здружението за сточари при Стопанската комора на Србија, за РТС изјави дека фармерите се добро запознаени со симптомите на болеста, но дека е важно да се знае како да се спречи нејзиното ширење. Будимовиќ предупреди дека претстои период кога прашање е што ќе биде со цената на свинското месо и со бројот на свињи.

Ова ќе биде тешка борба за одржување на производството на свињи и свинско месо, рече Будимовиќ во утринската програма на РТС.

Тој оцени дека ширењето на болеста може да биде предизвикано од миграцијата на туристите и големиот сообраќај на луѓе во летниот период, а носители на болеста се и производите што се користат за исхрана на свињите.

Станува збор за инфекција што ги погодува домашните и дивите свињи, а вирусот што ја предизвикува таа болест не е опасен по здравјето на луѓето, но влијае на економијата на земјите каде што се појавува.