ИГД: Што можеме да научиме од азиските премиум трговци?

Супермаркетите и малите продавници од соседството не се единствените жаришта на иновации што навлегуваат од азискиот континент, кои можат да ни понудат нови знаења.

Извор: ИГД, http://igd.com/

Според Организацијата за економска соработка и развој (ОЕЦД), до 2030 година две третини од глобалната средна класа ќе живее во Азија. Поради страста на азиските потрошувачи кон засилено експериментирање со различни производи од целиот свет, денес, регионот се претвори во расадник од иновации. Во оваа статија, Џени Ли, сениор аналитичар за малопродажба во ИГД – Азија, ги анализира трите клучни области на најдобрите практики на азиските премиум малопродажни трговци.

1. Зголемување на привлечноста на интернационалните производи

Во последните години, на азискиот континент се забележува прилив на интернационални производи и брендови. Елитните маркети експериментираат со широк спектар од промотивни и мерчандајзинг-тактики за пласирање на овие прекуокеански понуди.

Вообичаено е во маркетите да се видат различни знамиња и истакнати симболи од земјите, кои укажуваат на потеклото на производите. Оваа комуникација, која е клучна, обезбедува уверување во автентичноста и во квалитетот на производите. Голем дел од азиските трговци редовно организираат и тематски настани, кои отвораат бројни можности за вкрстени промоции.

2. Промоција на (релативно) нови категории

Иако чајот во Велика Британија беше воведен во 1657 година, тој стана дел од британското секојдневие дури во 18 век. Поаѓајќи од тоа, заклучуваме дека потребни се време и напор (се надеваме не толку долго!) за да се развие интересот на потрошувачите од Азија кон нови категории – како што се виното и сирењето. Малопродажната трговија игра огромна улога во запознавањето на потрошувачите со новите категории производи, како и за нивната едукација.

Ако го земеме виното како пример, во голем број продавници на азискиот континент (на пример, „Џејсонс“ во Сингапур) се нудат професионални совети што им помагаат на потрошувачите да направат избор од широкиот асортиман. Со дегустациите на вино, потрошувачите добиваат нови информации за овој пијалак и подобро ги запознаваат неговите специфики.

Друг начин за да се убедат потрошувачите да пробаат нов производ е нагласувањето на здравствените придобивки. Овој пристап може да се примени во повеќе категории, вклучувајќи ги маслиновото масло, органското овошје и зеленчук итн.

3. Нови решенија „food-to-go“ и „food-for-now“

Жителите на континентот на изгрејсонцето имаат сè подинамичен животен стил и помали семејства во споредба со претходно. Локалните маркети ги следат тие промени и развиваат нови оддели за храна за носење  (food-to-go), како и посебни оддели каде што потрошувачите можат да ја консумираат вечерата, односно готовото јадење, што го купиле од маркетот. Забележавме нови решенија во маркетите, кои ѝ даваат дополнителна вредност на целокупната понуда, а со тоа привлекуваат и нови потрошувачи.

Со овие иновации, маркетите се трансформираат во социјални места, кои го подобруваат квалитетот на живеење на потрошувачите.

Понатамошни импликации

Иако засега азиските премиум трговци се насочени кон сегментирани групи потрошувачи, станува јасно дека тие ќе добиваат сè поголема популарност како што ќе се зголемува финансиската моќ на средната класа.

Интернационалните компании што работат во тој регион, сè повеќе се фокусирани кон супермаркетите и кон малите продавници од соседството, но, според нашето мислење, премиум продавниците се еднакво голем извор за најдобрите практики и решенија, кои нудат нови можности за пораст.