„Виндија“ ги зголеми платите на сите вработени во Хрватска

Откако групацијата „Виндија“ од Вараждин од септември минатата година двапати ги зголеми платите на своите вработени, на првиот ден од октомври, најави повторно зголемување на сите вработени во групацијата кои работат во Хрватска.

Станува збор за ново вложување од речиси 2,5 милиони евра, што заедно со претходните зголемувања претставува нешто повеќе од 9,9 милиони евра повеќе за плати на годишно ниво.

Заедно со потпишувањето на синдикалниот колективен договор со вработените во „Виндија“ на почетокот на летото и договорот со Владата на Република Хрватска за ограничување на цените на млекото и пилешкото, ова есенско покачување на платите е дополнителен чекор на водечката прехранбена  компанија во зајакнувањето на својата позиција на пазарот, како и задоволството на вработените и грижата за потрошувачите. Според одлуката на Управниот одбор на групацијата „Виндија“, сите вработени ќе земат повисока бруто-плата за октомври, со редовната исплата во ноември.

Уделот на пазарот и добрите деловни резултати се јасен одраз на работата и напорите на секој вработен во компаниите дел од групацијата „Виндија“. Многу ја цениме нивната улога и придонес, а зголемувањето на нивната плата е само еден од начините на кои сакаме да го подобриме нивното задоволство. Сакаме да ја зајакнеме нашата лидерска позиција на пазарот и, како посакуван работодавач, да продолжиме да привлекуваме нови, млади и способни луѓе, рече Ненад Клепач, претседател на Управниот одбор на „Виндија“.