Македонија

ММФ на Македонија ѝ додели 161 милион евра

23 Aug 2021

Меѓународниот монетарен фонд (ММФ) ѝ додели нови, околу 133 милиони специјални права на влечење (СПВ), или околу 161 милион евра на Македонија, кои од денес ќе бидат вклучени во официјалните девизните резерви.

Овој износ нѝ е доделен во рамките на новата општа распределба на СПВ на ММФ и соодветствува со нашата квота во ММФ, соопшти Народната банка.

ММФ распредели вкупно 455 милијарди СПВ (околу 551 милијарда евра) на 190 земји членки. Ова е најголемата распределба на СПВ во историјата, или двојно повисока од сите досегашни распределби заедно. Последната општа распределба на СПВ беше во 2009 година, кога беа распределени 161,2 милијарди СПВ на земјите членки, се вели во соопштението на НБРМ.

Целта на општата распределба на СПВ е овојпат со нив да се обезбеди непречен пристап до девизна ликвидност за земјите во време на најголемата здравствена и економска криза со која се соочува светот во изминатите децении.

Придобивките за земјите се повеќекратни: со нив се обезбедува брзодостапна и безусловна девизна ликвидност со која се зголемуваат девизните резерви, односно се зголемува девизниот потенцијал на економијата, што го јакне потенцијалот на економиите за справување со кризата, соопшти Народната банка.

СПВ се резервни средства креирани од ММФ коишто земјите членки можат да ги чуваат како дел од своите официјални резерви или пак да ги искористат за плаќање долгови и камати, за идно зголемување на квотата во ММФ или за други буџетски потреби. Доколку ги чуваат како дел од своите официјални резерви, земјите немаат никаков трошок. Доколку се претворат во друга валута за да се искористат за други цели, тогаш трошоците за земјата се исклучително ниски (тековно каматна стапка на користење на СПВ изнесува 0,05%).

 

 



@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...