Вкупно 17.005 граѓани останале невработени во ковид кризата

Со состојба до 30-ти април 2021 година, во Агенцијата за вработување (АВРМ) се евидентирани 17.005 невработени лица, за кои одјавата од задолжителното осигурување е регистрирано во периодот после 11-ти март 2020 година, односно во време на ковид-кризата.

Ова го потврди директорот на Агенцијата за вработување, Абдуш Демири на прес-конференција.

Тој ги претстави новите можности за аплицирање за мерките и програмите од Оперативниот план, за кои огласите се веќе распишани. 

Владата дава дополнителна можност на сите заинтересирани невработени лица и работодавачи да аплицираат за мерките и програмите од Оперативниот план за 2021 година. Јавните огласи за мерките самовработување, субвенционирање плата, практиканство, обука на работно место за познат работодавач и програмата за јавни работи се објавени денеска и може да се аплицира до петок, односно 28 мај, рече Демири. 

За мерката „самовработување“ аплицирале 2523 лица, што е поголем број од предвидените 1762, кои што ќе бидат доделени.