Трамп воведе царина од 33 отсто за Македонија

Американскиот претседател Доналд Трамп воведе нови царини за увозот од 180 земји, вклучувајќи ја и Македонија. За увозот од Македонија, Трамп одреди царина од 33 отсто.

На презентацијата на новите царини во Белата куќа, Трамп покажа серија табели со детали за царинските стапки, но и за царинските стапки кои што другите земји и ги наметнуваат на САД. Во овие царински стапки на другите земји од администрацијата на Трамп велат дека се вклучени манипулации со валутите и трговски бариери.

Стапките на царини што ги воведува Трамп се движат од 10 до 50 отсто, а за Македонија, според она што го објави се 33 отсто, односно половина од тоа што, според табелите, земјата го има како царина кон САД, а тоа е 65 отсто.

Трговската размена меѓу Македонија и САД минатата година изнесувала 314 милиони долари, од кои што 118 милиони долари е извоз на Македонија.

Трамп воведе царини од 20 отсто на земјите од ЕУ, како и 34 отсто на Кина. На Балканот, најголема царинска стапка отсега ќе има Србија – 37 отсто, по што следува БиХ со 35 отсто, додека Албанија и Косово ќе имаат по 10 отсто.

Новите царински стапки треба да стапат во сила во текот на наредните седум дена.