САД: Опаѓа расположението на купувачите

Индексот на довербата на потрошувачите во американската економија во јуни падна на 100,4 поени од 101,3 поени кои беа измерени во мај, соопшти Конференцискиот одбор на Њујорк. Падот на индексот е во согласност со очекувањата на аналитичарите од Волстрит.

Довербата малку се намали во јуни, но остана на нивото на кое беше во изминатите две години, бидејќи потрошувачите остануваат сигурни за пазарот на труд, а истовремено се грижат малку повеќе за тоа што ќе го донесе иднината, изјави Дана Петерсон, главен економист на Конференцискиот одбор , пренесува „Сибиз“.

Таа предупреди дека индексот би можел да паѓа доколку се влоши состојбата на пазарот на труд.

Индексот на доверба во тековните економски услови се зголеми од 140,8 во мај на 141,5 поени во јуни, додека индексот на очекувањата за следните шест месеци падна од 74,9 на 73 поени.

Министерството за трговија неодамна објави дека продажбата во малопродажниот сектор во САД пораснала за само 0,1 отсто во мај, помалку од очекувањата на економистите кои очекувале пораст од  0,3 отсто.

Извор: Biznis.rs

Фото: Pexels