ММФ одобри 650 милијарди долари помош за сиромашните земји

Извршниот одбор на Меѓународниот монетарен фонд (ММФ) одобри распределба на специјалните права за повлекување (СДР) во износ од 650 милијарди долари, така што распределбата на девизните резерви за 190 земји членки ќе заврши до крајот на август.

Извршната директорка на ММФ, Кристалина Георгиева изјави дека сега ќе претстави предлог за распределба на СДР, најголема во 77-годишната историја на меѓународната финансиска институција, до Управниот одбор на Фондот и претставници на сите земји членки на ММФ.

Ова е голем поттик за иницирање активности во светот. Алокацијата на СДР ќе ги зголеми ликвидноста и резервите на сите наши земји членки, ќе ја зајакне довербата и ќе ја зајакне отпорноста и стабилноста на глобалната економија, истакна Георгиева пред следниот состанок на министрите за финансии на Г20 и гувернерите на централните банки во Венеција, кој започнува денеска.

Во 2009 година, ММФ распредели СДР резерви од 250 милијарди долари на земјите членки за да помогне во ублажување на ефектите од светската финансиска криза. СДР се девизни средства на ММФ, составени од кошница со валути – доларот, еврото, јенот, фунтата и јуанот.

За да можат да го потрошат распределениот износ на СДР, државите прво мора да ги разменат за една од основните силни валути, што бара од нив да најдат земја партнер која е подготвена да разменува.