Претставуваме: „Анче тобако“

Брзината на услугата, љубезноста, флексибилноста – тоа се адутите на малите продажни места кои им ја гарантираат иднината.

Разговараше: Данче Драгинова, danche@instore.mk

Приказните на малите трговци, исполнети со топлина, емоции и со многу труд, ни покажуваат колку тие се неизоставен дел од големиот мозаик на трговијата. Нашата соговорничка Вангелина Ристоска, или, како што сите ја викаат – Анче, е потврда за привлечната сила на трговијата – тој што еднаш стапнал на „трговската сцена", работел и живеел со таа динамика, тешко може да одлучи да ја напушти.

Првпат, Анче се појавила на сцена кога имала 19 години, а од 2006 година почнала со сопствен бизнис: Долги години го имавме киоскот „Хри-Ан", исто така во Тетово, но на друга локација, вели таа и додава дека поради приватни причини, фирмата ја префрлиле на друг човек и лани, по пауза од неколку години, таа се враќа на стариот бизнис.

„Анче тобако", кој е на адреса Илинденска, бр. 1-13 во Тетово, е отворен на 1 октомври минатата година. На површина од 15 квадратни метри, киоскот располага со една каса, што е сосем доволна за услужување на купувачите. Oсвен Анче, тука работи уште еден вработен, но од голема корист е помошта од ќерката и од синот. Таа со насмевка ни се довери: Децата веќе се навлезени во финесите на занаетот.

Асортиманот од речиси 10.000 производи, опфаќа цигари, пијалаци, бонбониери, кондиторски производи, грицки и друго. Киоскот има и лиценца за продажба на алкохолни пијалаци, чијашто продажба, како и продажбата на цигарите, високо котира во однос на другите трговски групи.

Најчестите купувачи во „Анче тобако" се тие на поминување, но и соседите, кои секојдневно купуваат тука. Како човек, речиси секогаш сум насмеана, весела и позитивна. Довербата од купувачите ја придобивам и ја одржувам со љубезноста и со тоа што се обидувам да ги задоволам нивните барања, нудејќи им ги најдобрите производи. Во оваа работа, љубезноста, насмевката и непосредноста стануваат дел од тебе, вели Анче.

Иако во околината на киоскот функционираат неколку трговски синџири, нашата соговорничка не верува дека тие имаат големо влијание на продажбата. Се бориме со ефикасноста и со квалитетот во работата. Нашите најсилни оружја се брзината на услугата, љубезноста и поголемата флексибилност за задоволување на потребите на потрошувачите, истакнува таа.

При изборот на асортиманот, Анче следи реклами и кампањи, но од најголема важност, според неа, се желбите на потрошувачите. Со комерцијалистите,  како и со поискусните, така и со новите, нашата соговорничка е во суперкоректен однос, кој функционира беспрекорно и без притисоци: Никој не може да ми наметне нешто што не ми е потребно. За еден производ да се најде на полиците, треба да има добра цена со добра понуда од фирмата што го нуди, но првенствено – да биде баран на пазарот.

Таа признава дека поради малку слободно време, не ги следи постојано трендовите кога се во прашање новите технологии, но затоа, пак, ги користи социјалните мрежи: Во денешното турбулентно и динамично време, социјалните мрежи се добредојдени во работењето, особено поради тоа што може да се користат како реклама за сопствениот бизнис.

Сопственичката е полна со идеи за идниот развој на бизнисот. Моментално работам со еден објект, но планирам летово да отворам најмалку уште еден, ни ги открива амбициозните планови за годинава.

На крајот од разговорот, ја прашавме Анче каква иднина им предвидува на малите продавници, а таа со голема ведрина и со позитивна енергија порача: Колегите од истиот бизнис мора да бидат упорни и да не се предаваат предвреме. Искрено, мислам дека малите продавници имаат иднина, бидејќи на луѓето им го нудат тоа што тие го бараат – брза услуга без турканици!