Јасна Стоимировска-Величков: Со невромаркетинг до ефективна реклама

Дури и ако пазарот е презаситен од реклами на конкурентни компании, со неколку практики може да се изборите да му го привлечете вниманието на купувачот.

Автор: Јасна Стоимировска-Величков, info@agrarko.com

Купувачите секојдневно се изложени на илјадници рекламни пораки, за кои компаниите плаќаат огромни суми за да бидат видени. Во 2019 година компаниите на глобално ниво потрошиле 334 милијарди долари на реклами, објавува „Сатиста“.

Сигурно сте забележале дека додека барате некоја информација на интернет, ќе бидете принудени да погледнете некој оглас или да изгледате „спонзорирано“ видео пред да продолжите да ја гледате вашата одбрана содржина. Тоа значи дека додека купувачите бараат некоја информација, и компаниите бараат нешто од купувачите – да ја забележат нивната порака, со цел да постапат според тоа што пораката го споделува.

Иако рекламите во денешно време се неизбежни, не мора да значи дека доколку сме изложени на повеќе, поголема ќе биде веројатноста да реагираме на нив. Мозокот автоматски игнорира дел од пораките, а друг дел од пораките ги регистрираме несвесно, без да знаеме дека тие можат да ни влијаат.

Нормално, купувачот не може да ги процесира сите рекламни пораки, па како да бидете сигурни дека рекламата на вашата компанија би била таа што ќе остави впечаток и ќе манифестира привлечност?

Во овој текст прочитајте како компаниите ги користат невромаркетиншките техники за да креираат ефективни реклами, а ќе ви бидат презентирани и неколку практики што можат да ви помогнат да направите минимална, но содржајна реклама.

Огласите што купувачите ги гледаат денес можат потсвесно да влијаат врз нивното купување следниот ден, по една недела, па дури и по една година.

Моќта на рекламирањето со невромаркетинг

Новите невромаркетиншки техники можат да ги измерат потсвесните реакции на гледачите и влијанието што рекламите го имаат врз нив. Дури и ако пазарот е презаситен од реклами на конкурентни компании, со овие неколку практики може да се изборите да му го привлечете вниманието на купувачот.

На сликите подолу е прикажано како се користи следач на поглед (eye tracker) во комбинација со други биометриски сензори додека трае одредена реклама. Од следачот на поглед дознаваме како се движи погледот на гледачот и каде најмногу се задржува. Дали гледачот ги забележува производот и логото на брендот или, пак, вниманието му го привлекуваат некои други не толку важни детали. Од друга страна, со помош на електроенцефалографија (ЕЕГ) ја дознаваме емоционалната ангажираност на гледачот во одредено време и добиваме позитивни или негативни одговори за содржината на рекламата, мерејќи ја електричната активност на мозокот.

Целта не е да се убеди купувачот да го купи вашиот производ еднаш, туку да се создаде емоционална врска со брендот која ќе биде трајна. Се разбира, со точни и искрени приказни.

Со помош на овие резултати дознаваме дали станува збор за ефективна рекламна содржина или таа содржи делови што не привлекуваат внимание или не би биле значајни за пораката што рекламата се обидува да ја пренесе.

Еден ваков тип истражување е од огромно значење за компаниите што инвестираат голем дел од својот маркетинг-буџет во реклами, кои најчесто се прилично скапи. Од друга страна, гледачите ќе бидат поштедени од реклами што пренесуваат збунувачки пораки или неправилно ја пренесуваат вредноста на производот.

При креирање маркетинг-содржина поставете ги сликите одлево, а текстот оддесно. Левата  хемисфера на мозокот е подобра при обработка на текст и броеви, а десната е подобра при обработка на сликите.

Освојте го срцето на потрошувачот, а не само неговиот паричник

Компаниите очекуваат рекламирањето да се исплати на долгорочен период, па поради тоа рекламирањето бара и меморија. Огласите што купувачите ги гледаат денес можат потсвесно да влијаат врз нивното купување следниот ден, по една недела, па дури и по една година.

Целта не е да се убеди купувачот да го купи вашиот производ еднаш, туку да се создаде емоционална врска со брендот која ќе биде трајна. Се разбира, со точни и искрени приказни. Ако имате план или веќе правите нешто што ја поддржува заедницата во која работите, промовирајте го и тоа, а не само пазарната цел. Потрошувачите сè почесто избираат брендови што имаат изградено позитивен имиџ кога станува збор за општествени практики. Понекогаш се спремни да платат и повеќе за ваков тип производ или услуга.

Користењето хумор во рекламите остава позитивен впечаток. Една смешна и искрена приказна ќе привлече повеќе внимание од обичната, која би содржела само информации за производот што го продавате. Рекламите што успеале да ги насмеат гледачите ќе бидат подобро запаметени.

Ако вашата реклама е наменета за мажите, пратете кратка и фокусирана порака. Ако се рекламирате со постер или слично, користете повеќе слики и избегнувајте долги текстови.

Ако вашиот потенцијален купувач е жената, прикажете слики на кои има луѓе што прават некоја заедничка активност. Може да користите и подолг текст, па дури и некоја загатка. Исто така,  жените позитивно реагираат и на контраст. На пример, доколку е применливо за вашиот производ или категорија, ви препорачувам да покажете некое „пред и потоа“ искуство.

Можат да се издвојат и неколку општи практики кои се значајни за сите целни групи на купувачи. На пример, при креирање маркетинг-содржина поставете ги сликите одлево, а текстот оддесно. Чарлс Јанг во книгата „Прирачник за истражување реклами“ има објавено дека левата  хемисфера на мозокот е подобра при обработка на текст и броеви, а десната е подобра при обработка на сликите. Притоа, поради анатомската природа, мозокот полесно ќе ги обработува информациите на кои е изложен. На овој начин и сликата и текстот би биле подобро запаметени. Земете го ова предвид кога ќе креирате содржини за постери или содржини за веб-страница.

Користете едноставен јазик во рекламите. Колку е поедноставен јазикот, толку појасно ќе ѝ ја пренесете пораката на вашата целна публика.

Доколку сакате да искомуницирате некоја важна порака или мото, направете го тоа на почетокот или на крајот од рекламата. Мозокот не се фокусира на средни делови, туку на почеток и крај. Содржините во средината обично не се паметат, затоа најинтересното чувајте го за крај.