Општините ќе одредат кои маркети ќе доставуваат продукти во текот на полицискиот час

Општинските кризни штабови ќе треба да определат маркети од каде ќе се обезбедуваат граѓаните за време на продолжениот полициски час, објаснија од Владата преку соопштение до медиумите.

Според одлуката од 36-тата владина седница, од утре полицискиот час за сите граѓани во работните денови ќе почнува во 16 часот и ќе завршува во 5 часот, а во викендите ќе има целосна забрана, односно полициски час од 16 часот во петок до 5 часот во понеделник.

Во периодот на полицискиот час, од маркетите определени од општините продукти ќе доставуваат маркетите или волонтери, а фирмите што веќе вршат достава на храна преку онлајн нарачки ќе доставуваат и во сабота и недела.

Сите државни органи и институции и претпријатија, но и општинските власти, кои имаат вработени во Скопје што живеат во други градови и доаѓаат во главниот град на работа, ќе треба тие вработени да ги упатат на задолжително работење од дома. За останатите вработени, работното време ќе мора да се планира така сите тие да стасаат дома пред почетокот на забраната во 16 часот.

Од новите мерки се исклучени вработени во здравствените институции, полицијата, армијата, царината, како и земјоделците и сточарите.