Анализи

Еуромонитор: Топ-10 потрошувачки трендови за 2020 година

29 мар 2020

Истражување објавено во мартовското издание на InStore бр. 75

Две главни теми што се очигледни во потрошувачките трендови за годинава се погодноста и личната контрола.

Извор: „Еуромонитор интернационал“

Секоја година „Еуромонитор интернационал“ ги идентификува новите трендови што ќе бидат двигатели во индустријата. Овие трендови овозможуваат преглед на промената на потрошувачките вредности, анализираат како се менува однесувањето на потрошувачите и предизвикуваат нарушувања во бизнис-активностите на глобално ниво.

Две главни теми што се очигледни во потрошувачките трендови за годинава се погодноста и личната контрола. Потрошувачите се стремат да постигнат баланс меѓу нив, но тоа не секогаш е едноставно.

  1. Над човечкото

Вештачката интелигенција станува мејнстрим

Благодарение на вештачката интелигенција (ВИ), годинава сè почесто ќе се користи зборот Alexa. Виртуелните асистенти, паметните уреди, четботовите и апликациите управувани од ВИ веќе продираат во бизнис-операциите, логистиката на синџирите за снабдување и во животот на потрошувачите. Бизнисите се движат „над човечкото“, создавајќи одржливи можности за развој со помош на технологијата.

Иако е потребно време за целосна доверба и универзален пристап до оваа технологија, идејата за роботи управувани од ВИ за сопствена благосостојба, практичност и удобност станува сè поприфатлива.

Трендот „над човечкото“ ќе остане и во иднина. Потрошувачите веќе се подготвени повеќе да трошат на нова технологија и сè повеќе ги прифаќаат паметните домашни апарати и виртуелните асистенти. Растејќи со технологијата како составен дел од животот, генерацијата Алфа нема да прави разлика меѓу дигиталното и физичкото.

  1. Информации за неколку секунди

Повеќе содржини за помалку време

Повлечи, кликни и скролај се главните рефлекси за пребарување информации. Со пошироката достапност и употреба на технологијата, особено од помладите генерации, потрошувачите имаат пристап до море од информации со помалку бариери. Сепак, со тоа доаѓа и потребата да се идентификуваат релевантните извори. Потрошувачите постојано бараат персонализирани, автентични и привлечни канали. Тие веќе се навикнаа на пократка содржина.

Брендовите и платформите произведуваат привлечна содржина преку визуелни знаци и аудитивни коментари, односно мултисензорна и брза содржина која предизвикува моментално задоволство. Во 2020 година ова е стандард за услуга, а доколку тој не е исполнет, потрошувачите ќе се преселат на следната опција.

Непосредното задоволство што потрошувачите го чувствуваат, како и брзата и релевантна содржина, дополнително ќе го поттикне циклусот на иновации. Зголемената употреба на паметните телефони, подемот на средната класа и помладите генерации со фокус на визуелниот ефект, особено на новите пазари, ќе го поттикнуваат развојот на трендот „информации за неколку секунди“.

  1. Мобилност без пречки

Повеќе уникатни опции за транспорт

Потрошувачите бараат слобода да се движат низ градовите како што тие сакаат. Со апликациите за навигација потрошувачот ги планира патувањето и движењето, а истовремено бара и ажурирање во реално време за на најдобар начин да стигне од точка А до Б, без разлика дали е тоа со воз, такси, електричен велосипед, скутер или комбинација од сите превозни средства. Потрошувачот бара транспортот низ градовите да биде модуларен и персонализиран на неговите индивидуални потреби.

Светската популација сè повеќе станува урбана. Економскиот просперитет, високото образование и возбудливиот социјален живот ги привлекуваат потрошувачите во градовите. Брзото зголемување на популацијата во големите градови придонесе за појава на мегаградови, чиј број годинава изнесува 33. Во нив живеат и по повеќе од 10 милиони жители, што подразбира густ сообраќај на патиштата и пренатрупан јавен превоз.

Патувањето на две тркала (велосипеди, скутери, електрични тротинети) е популарен и одржлив метод за транспорт во развиените економии и ефикасна алтернатива за автомобилите. Сепак, потрошувачите не сакаат да се потпрат само на еден метод за транспорт и бараат повеќе опции за мобилност. „Мобилност без пречки“ не е повеќе аспирација на потрошувачите, туку нивно очекување.

  1. Инклузивност за сите

Попреченоста во центарот на вниманието

Брендовите се грижат за луѓето со попреченост, отклучувајќи го потенцијалот на модерниот модел „инклузивност за сите“. Компаниите ги реосмислуваат своите производи и услуги за да ги направат подостапни за секого, претставуваат и застапуваат поединци и помагаат да се намалат предрасудите за различностите и за разликите. Брендовите реагираат на социјалниот притисок за промена и прават чекори кон автентичноста и инклузивноста, вградувајќи ги во основата на развојот на нови производи.

Денес глобалната свест за трендот „инклузивност за сите“ се зголемува, и тоа од корпоративни стратегии до развој на нови производи. Како дел од стратегиите за одржлив развој, компаниите експлицитно ги опфаќаат потребите на луѓето со посебни потреби, ветувајќи дека нема да изостават никого.

Брендовите ја менуваат традиционалната агенда за маркетинг и преминуваат од стратегијата на сегментација на потрошувачите кон инклузивност. Наместо да се фокусираат на разликите на поединците, брендовите се осврнуваат на нивната сличност.

  1. Грижа за себе

Менталната благосостојба конвергира со физичката

Според Светска здравствена организација, еден од четворица возрасни во развиениот свет страда од анксиозност, а помалку од половината од нив примаат третман.

Потрошувачката на стимуланси за ублажување на стресот, како што се цигарите и алкохолот, постепено опаѓа. Наместо тоа, за да ги решат специфичните потреби за ментална благосостојба и да ги спречат физиолошките ефекти од стресот, грижата и несоницата, потрошувачите бараат производи засновани на резултати.

Производите што се наменети за подобрување на расположението и за релаксација, за ослободување од стресот и од вознемиреноста, за зајакнување на функцијата на мозокот итн. сè повеќе се распространети во асортиманите на индустриите за безалкохолни пијалаци, козметика и др. Современиот потрошувач сè почесто ги донесува одлуките за набавка на производи или состојки врз основа на нивниот специфичен исход и како тој ќе се чувствува по консумацијата.

Брендирањето и комуникацијата со потрошувачите директно го рефлектираат трендот „грижа за себе“ со лансирање функционални производи.

Овој тренд е гласник на новата иднина на општествено одговорна интоксикација од традиционалните стимуланси, како што се алкохолот и тутунот.

  1. Мултифункционални домови

Безбеден простор поврзан со широкопојасен интернет

Во време на економска, политичка или лична неизвесност потрошувачите се повлекуваат во удобноста на сопствениот дом. Во обид да се вратат на вистинскиот пат, тие се повлекуваат на нивните лични безбедни места, каде што се ослободени од дистракциите на светот околу нив. Иако оваа тенденција не е ништо ново, првпат голем број потрошувачи не сакаат да го напуштат домот, но истовремено – и не мораат. Благодарение на брзиот пристап до интернет и иновативните услуги, потрошувачите можат да купуваат, работат, играат и да вежбаат во удобноста на своите „мултифункционални домови“.

Процентот на домаќинствата со пристап до широкопојасен интернет е двојно зголемен од 2010 година, што им овозможува на потрошувачите пристап до интернет од домот со иста брзина како и од работните места. Како резултат на тоа, компаниите и работниците ги прифаќаат придобивките на работата од далечина, поддржани од низа софтверски производи што овозможуваат состаноци, разговори и соработка преку интернет.

Зголемувањето на популарноста на работата од далечина ќе ја забрза еволуцијата на домот. Импликациите за индустријата ќе продолжат да бидат драматични и далекосежни.

  1. Приватна персонализација

Оптимизирај или откажи!

Потрошувачите очекуваат персонализирани производи и услуги, но за да го оптимизираат своето искуство, потребно е да споделат повеќе лични информации.

Компаниите инвестираат во алгоритми и методи за собирање податоци за да постигнат попрецизен маркетинг. За возврат, потрошувачите трошат помалку време за истражување на опциите на производите. Сепак, потрошувачите стануваат загрижени за тоа кој сè има пристап до нивните податоци и како ги користи.

Компаниите може да бидат казнети доколку не се транспарентни за тоа какви податоци собираат и како ги користат. Според „Лајвкликер“, трговците што инвестираат во напредни тактики за персонализација ги зголемуваат приходите за 17% повеќе во споредба со тие што користат помалку софистицирани методи. Притисокот да се понуди персонализирано искуство ги предизвикува брендовите и трговците да ја зголемат колекцијата од податоци за потрошувачите и ефикасно да ги користат.

Брендовите користат проактивни методи за да им овозможат на потрошувачите поперсонализирано искуство, но за да ја постигнат целта, тие сè повеќе стануваат зависни од податоците. Додека многу потрошувачи уживаат во персонализираните искуства, многумина се прашуваат која е цената за тоа. Затоа, неопходни се транспарентност, безбедност и опции за откажување.

  1. Гордо локално, одиме глобално

Повик за индивидуалност, во склад со националниот идентитет

Гордоста и моќта на локалната култура ќе станат поостро дефинирани и релевантни годинава. Овој тренд е рефлексија на чувството на потрошувачот за почит кон сопствениот национален идентитет, а истовремено ги зголемува и очекувањата од мултинационалните компании да одговорат соодветно и креативно на локалната култура, социјалните норми и на навиките на потрошувачите.

Се забележуваат подлабоки промени во етичката вредност на потрошувачката, при што фокусот се преместува на локалноста. Според потрошувачите, врвни приоритети се одговорноста кон животната средина, развојот на локалните бизниси и нивното поврзување со заедниците.

Трендот на „локална гордост“ ја зголемува популарноста на локалните брендови, особено на пазарите во развој, позиционирајќи ги на исто рамниште со брендовите на мултинационалните компании. Глобалните играчи се заинтересирани да го локализираат производството или да ги аквизираат постојните локални производители. Овие стратегии им помагаат на мултинационалните компании за подобро да се приспособат на потребите на локалното население, што се јавува како резултат на културните разлики или пониската куповна моќ.

  1. Повторната употреба е револуционерна

Апциклирањето е новиот начин на рециклирање

Денешните лидери за одржливост влегуваат во нови циркуларни бизнис-модели чија цел е да понудат повеќе со помалку преку споделување, повторна употреба, повторно полнење и изнајмување. Зголемената свест за животната средина го придвижува трендот на „повторна употреба“, особено кај помладите генерации, за кои искуството е поважно од сопственоста. Тоа создава одржливи бизнис-можности. Ознаките за рециклирање го губат кредибилитетот поради недостиг на знаење за рециклирање на производот. Новите деловни модели што го следат пристапот на нулта отпад, преку создавање вредност од нуспроизводите, се попривлечни за современите потрошувачи.

Деновите на бизнисите што земаа неограничени материјали од природата и враќаа малку назад веќе завршија.

  1. Чист воздух насекаде

Загадувањето на воздухот е главна тема

Зголемената грижа за личната благосостојба и за околината го ставаат квалитетот на воздухот во центарот на вниманието. Зајакнувањето на притисоците врз владите да се спречи порастот на температурите се покажува преку зголемениот активизам на потрошувачите. Овие реакции имаат цел да ја спасат планетата од потенцијална еколошка катастрофа. Трендот „чист воздух насекаде“ покажува дека свеста за загадувањето на воздухот влијае врз изборот на потрошувачите и укажува на начинот на кој брендовите треба да се позиционираат за ги таргетираат освестените консументи.

Заклучок

Погодноста и личната контрола се двете најголеми теми во 2020 година. Понекогаш тие се комплементарни, но може да бидат и противречни една на друга.

За да постигнат поголема погодност, потрошувачите можеби ќе треба да се откажат од личната контрола. Потрошувачите сакаат пократка, персонализирана содржина, што значи дека тие ќе мора да тргуваат со сопствените приватни податоци. Количеството на податоци и приватноста што потрошувачите ќе треба да ги понудат за посакуваните придобивки ќе се разликуваат според културата, територијата и индивидуата.

За да ги надминат грижите на потрошувачите во 2020 година, брендовите мора да го најдат балансот меѓу градењето доверба, обезбедувањето сигурност и испораката на производи и услуги со додадена вредност.



@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...