Анализи

Мегатрендови: Потрошувачите ја презедоа контролата во свои раце

29 ное 2019
Aнализата на мегатрендовите им овозможува на компаниите да градат долгорочна стратегија што е проактивна наместо реактивна, но и да се осигурат дека ќе останат релевантни и ќе одат напред
 
Извор: Еуромонитор интернационал“
 
Во 2017 година тим од експерти од „Еуромонитор“ идентификува 20 мегатрендови во обликувањето на пазарот и ги прогнозира првите осум што ќе предизвикаат најмногу нарушувања во индустријата до 2030 година. Притоа, под поимот „мегатренд“ се подразбира долгорочна промена на однесувањата или ставовите на потрошувачите, што ќе има глобално влијание врз повеќе индустрии. 
 
1.Поврзани потрошувачи
 
Денешните потрошувачи користат компјутери, паметни телефони, таблет-уреди, уреди за навигација, е-читачи и голем број аудио и визуелни уреди за да доживеат искуства и да комуницираат преку дигитална содржина.
 
Технологијата е еден од доминантните двигатели на мегатрендовите, вклучувајќи го и трендот на поврзани потрошувачи. Иако речиси сите производи и услуги спаѓаат во доменот на IoT (Internet of Things, интернет на нештата), потрошувачите почнуваат да ја намалуваат зависноста од технологијата и да прибегнуваат кон повремено „исклучување“, познато како „дигитален детокс“.
Овој мегатренд ги потенцира и опасностите од технологијата. Моменталната природа на постојаната поврзаност создава притисок за реакција на пораките веднаш штом тие ќе пристигнат. Првично уредите беа дизајнирани за да бидат алатки за подобрување на животот на корисникот, но постепено се случи токму обратното – корисникот да се претвори во слуга на своите уреди.
 
Влијание врз потрошувачите:
 
Номофобија – ирационален страв да се остане без мобилен телефон;
ФОМО (Fear of missing out – FOMO) – чувство да се биде постојано во чекор со тоа што луѓето/брендовите го објавуваат на социјалните мрежи.
 
Што е следно?
 
Со оглед на тоа што корисниците сè повеќе се обидуваат да постигнат дигитален баланс и да го намалат времето поминато на интернет, брендовите мора да се осигурат дека секоја интеракција со потрошувачите треба да биде спроведена на стратешки начин и да обезбеди вредност. Покрај ова, промените во законите за приватност на податоците ќе продолжат да влијаат врз иднината на интеракцијата со потрошувачите бидејќи компаниите ќе мора да ги следат и почитуваат ограничувањата за собирање податоци.
 
2. Здрав живот
 
Потрошувачите применуваат холистички пристап кон здравјето, кој ги опфаќа духовната и менталната благосостојба, како и физичкото здравје. 
Базите на податоци, технологијата и променливите потрошувачки вредности се меѓу најголемите двигатели на мегатрендот за здрав живот. Здравото живеење претходно беше ограничено само на диетите и вежбањето, додека сега потрошувачите повеќе се фокусирани на менталното здравје, одржливоста и на етичкиот начин на производство.
 
Денешниот потрошувач бара:
 
Оптимизација на здравјето;
Производи од растително потекло и без лактоза;
Да се надмине табуто околу менталното здравје.
 
Што е следно?
 
Хиперблагосостојбата ќе продолжи да доминира во искуствата на потрошувачите, при што брендовите ќе го следат зголемениот фокус на превентивното здравје и на зголемената побарувачка на производи без хемикалии. Притоа, индустријата за храна и за пијалаци ќе се насочи на обезбедување персонализирани искуства за потрошувачите.
 
3. Етички начин на живот
 
Во корпоративните стратегии сè поголемо внимание се посветува на етиката и на моралните вредности. Тоа се пренесува на прашањата поврзани со загриженоста за животната средина, одржливоста, благосостојбата на животните, производството и работните практики, како и со желбите за позитивно влијание врз заедниците и врз луѓето.
Сè повеќе брендови работат на изградба и на спроведување одржливи и етички стратегии. Извештајот на „Еуромонитор“ од 2017 година прогнозира дека промените во животната средина, зголемените притисоци од дигитална публика со повисока свест и невладините организации ќе играат клучни улоги во дефинирањето на етичката промена. Статистиката денес покажува дека 28% од потрошувачите се чувствуваат добро кога купуваат еколошки или етички производи, а 39% од потрошувачите претпочитаат да купуваат помалку производи, но со повисок квалитет.
 
Денешниот потрошувач бара:
 
Етичко и одржливо пакување;
Транспарентност и автентичност;
Инспиративни и ангажирани брендови.
 
Што е следно?
 
Овој мегатренд е и ќе остане еден од најголемите нарушувачи на пазарот. Веќе сме сведоци на сè поголема активност на потрошувачите, зголемен притисок од надворешни тела и интериндустриски соработки за да се постигне одржливо работно опкружување. Поголемата транспарентност, минималистичкиот пристап (рециклирање и повторна употреба) и зголемениот пристап до информации ќе продолжат да го водат овој мегатренд.
 
4. Повторно осмислување на купувањето
 
Начинот на кој се купуваат стоки и услуги постојано се менува во чекор со промената на економската и на технолошката реалност за бизнисите и за потрошувачите. Потрошувачите купуваат преку најразлични платформи, па трговците мора да бидат подготвени да се ангажираат во секое време и на секое место, особено кога купувачките навики се префрлуваат од стоки на услуги.
Бројот на домаќинства што поседуваат најмалку еден паметен телефон се очекува да достигне до 72% до крајот на годинава, што укажува на тоа дека потрошувачите имаат сè поголема достапност до информациите за брендовите, производите и услугите. Со оглед на тоа што потрошувачите сега спроведуваат сопствени истражувања пред да набават нешто, деловните субјекти треба да им обезбедат непречен пат во текот на целото шопинг-патување.
 
Денешниот потрошувач бара:
 
Лични искуства во текот на шопинг-патувањето;
Погодно купување преку различни продажни канали;
Искуства во рамките на буџетот.
 
Што е следно?
 
Технологијата ќе продолжи да биде главниот фактор за понатамошен тек на овој тренд. Развојот на 5G, вештачката интелигенција и зголемената социјална продажба преку платформите како што е „Инстаграм“ веројатно ќе доминираат на пазарот. Иако иновацијата останува клучна, треба да се земат предвид и реперкусиите што може да настанат ако брендовите ја изгубат контролата на врската со потрошувачите.
 
5. Искуство повеќе
 
Уште една промена во однесувањето на потрошувачите е зголемениот акцент на искуствата, за сметка на поседувањето. Приоретизирањето на искуствата пред сопственоста резултира со пад на потрошувачката на трајни добра и континуиран пораст на потрошувачката на услуги.
 
Овој мегатренд е воден од милениумците, од кои 48% изјавиле дека при купувањето, пред сè и над сè, бараат ново искуство. Освен милениумците, друг важен двигател на овој тренд е и технолошкиот напредок, кој им овозможува на потрошувачите да искусат повеќе од брендовите. Оваа промена им овозможи на брендовите да трагаат по нови и креативни идеи за да ги придобијат и ангажираат потрошувачите, обезбедувајќи ја нивната лојалност.
 
Брендовите се приспособуваат на овој мегатренд:
 
Организираат настани како суштинска стратегија за „искуство повеќе“;
Експериментираат со маркетинг-стратегии;
Развиваат долгорочни стратегии од поп-ап продавници;
Го приоретизираат социјалното застапување преку „Инстаграм“.
 
Што е следно?
 
Околу 65% од потрошувачите им даваат приоритет на брендовите што имаат позитивно влијание врз животната средина и велат дека сакаат да имаат персонализирана интеракција со брендовите што ги вреднуваат. Со оглед на тоа што технологијата продолжува забрзано да се развива, овој мегатренд беспрекорно ќе се вклопи користејќи ја вештачката интелигенција.
 
6. Повлекување на средната класа
 
По глобалната финансиска криза средната класа на развиените пазари се бори да ја задржи економската позиција што ја уживаше претходно.
Од светската финансиска криза во 2008 година нееднаквоста на приходите рапидно се зголеми и во земјите во развој и во развиените земји, што доведе до намалување на големината и учеството на приходот од луѓето од средната класа. Како резултат на прераспределбата на економската моќ потрошувачите од средната класа сега ги менуваат навиките и приоритетите на потрошувачката.
 
Нови навики на потрошувачите од средната класа:
 
Селективни набавки – намалена лојалност кон брендот, зголемени компромиси и искуства;
Одлуки во рамките на буџетот – пазарување во дисконти;
Е-купување.
 
Што е следно?
 
Овој мегатренд се очекува значително да влијае врз сите други мегатрендови бидејќи потрошувачите од средната класа ќе останат темел и двигател на потрошувачката на пазарот. Притоа, и покрај тоа што мегатрендот „повлекување на средната класа“ потекнува од развиените земји, тој веќе се прошири и на пазарите во развој.
 
7. Премиумизација
 
Иако за многумина премиумизацијата не е ништо ново, тоа што се промени е мотивацијата што стои зад одлуките за купување на потрошувачите. Во суштина, премиумизацијата е за приоритетите. Со поголем избор од производи од кога било досега, по најразлични цени, потрошувачите ќе потрошат повеќе за работите што им се важни, а ќе штедат – честопати значително – за тие што не им се толку важни.
Овој мегатренд е воден од промената на економската моќ. Потрошувачите ја презедоа контролата во свои раце. Добро обмислениот пристап при купувањето (од премиум производи до премиум искуства) станува сè попопуларен – се кратат трошоците во една област за да се зголеми задоволството во друга.
 
Денешниот потрошувач бара:
 
Персонализирани и погодни услуги;
Здрав начин на живот – духовна и ментална благосостојба, физичко здравје;
Хармонија на производите и искуствата со емоционалните моменти.
 
Што е следно?
 
FMCG-играчите ќе мора да го задржат чекорот со иновациите и да понудат нови производи и искуствата за потрошувачите. Со оглед на тоа што иновациите продолжуваат да ја обликуваат иднината на овој мегатренд, најверојатно фармацевтските продавници и маркетите ќе се соединат, создавајќи централно тело за истражување и развој на нови производи.
 
8. Промена на границите на пазарот
 
Со оглед на тоа што делови од светот стануваат пренаселени или на друг начин го достигнале максималниот потенцијал, други придобиваат важност за нивниот неискористен потенцијал. За да се обезбеди иден пораст, бизнисите ќе мора да се приспособат на променливата демографска, економска и технолошка реалност, односно да ги донесат новите пазари од маргините во центарот на вниманието.
 
Прераспределбата на економската моќ, промената на популацијата и промената на животната средина се трите основни двигатели на овој мегатренд. Економската моќ се префрли кон Азија и кон Африка – 13 од 20-те најбрзорастечки економии се очекува да бидат од африканскиот континент. Азија се предвидува дека ќе стане најголемиот пазар, на чело со Кина. Зголемената потрага по природни ресурси значително влијае врз геополитичкиот пејзаж, со што ги менува и границите на глобалниот пазар.
 
Промени од 2017 година:
 
Зголемен интерес на мултинационалните компании за пазарите во развој;
Алатките за виртуелна реалност стануваат сè попопуларни и им овозможуваат подобри искуства на потрошувачите.
 
Што е следно?
 
Како резултат на зголемената популација и порастот на приходите, Азија е подготвена да стане ’рбет на глобалната економија. Бизнисите веќе преземаат активности и инвестираат во иновативни стратегии што се чувствителни на животната средина и на локалните заедници.
 
Мегатрендовите и бизнисот
 
Успешната идентификација, анализа и влијание на мегатрендовите се од суштинско значење за успех на компаниите што се стремат да имаат одржлив развој и да останат релевантни, бидејќи конкуренцијата се зголемува, а новите идеи може да нарушат цели индустрии. Среде големите промени за компаниите е тешко да разберат зошто индустриите се развиваат на начинот на кој се развиваат денес, а уште потешко да предвидат како ќе се развиваат во иднина.
 
Анализата на мегатрендовите им овозможува на компаниите да градат долгорочна стратегија што е проактивна наместо реактивна, но и да се осигурат дека ќе останат релевантни и ќе одат напред. Таа им овозможува подобро да ги идентификуваат новите трендови во развој, но и да ја следат еволуцијата на поставените долгорочни мегатрендови.


@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...