„Подравка“ ги награди вработените за исклучителни деловни резултати

„Подравка“ ги награди своите вработени со по 1000 куни (околу 135 евра) нето, за исклучителните деловни резултати што ги постигнува компанијата. 

Минатата 2018 година е една од најдобрите години во долгогодишното постоење на „Подравка“, во која со исклучителни постигнувања во сите деловни сегменти и со трудот на нашите вработени, остваривме добри деловни резултати. Тој тренд продолжи и оваа година. Важно ни е што по подолго време, на нашите вработени им овозможивме подобри работни и материјални услови и ги наградивме за нивната лојалност кон компанијата. Задоволен и мотивиран работник е клуч на растот и развојот на една компанија и затоа ќе продолжиме да ги подобруваме нивниот статус и нивните материјални права, изјави Марин Пуцар, претседател на Управата на „Подравка“. 

Покрај оваа награда, „Подравка“ за по околу 1.000 куни ги зголеми платите на најниско платените работници, а за сите вработени ги зголеми основиците на платите и фиксните додатоци, како и јубилејните награди и бонусите за Велигден.