Малопродажба

Гомекс: Инвентивни решенија за поттикнување на лојалноста

23 мај 2017
 

Програмата за лојалност на трговскиот синџир „Гомекс" од Зрењанин на корисниците им овозможува инстант заштеди и собирање бонитетни поени при купувањето во мрежата на малопродажните објекти на компанијата и на надворешните партнери. Со услугата „Селектор на попусти", корисникот може самиот да ја креира листата на производи што сака да бидат на акција.

Приреди: Ана Филиповиќ, ana@instore.rs

Tрговскиот синџир „Гомекс" од Зрењанин на почетокот од 2015 година ја надгради својата програма за лојалност со проектот „Kasica Brojalica", кој неодамна беше избран за едно од најинвентивните решенија за електронска трговија и за штедење преку интернет во Србија.

Картичката е унапредена верзија на нејзината претходничка, картичката за лојалност „Kartica Kasica", и е развиена во соработка и со техничка реализација од макретинг-агенцијата „One stop marketing" од Зрењанин, со добро подготвена ИТ-инфраструктура, со прифаќање и со обработка на голем обем податоци. На корисниците им овозможува инстант заштеди и собирање бонитетни поени при купувањето во мрежата на малопродажните објекти на „Гомекс" и во мрежите на надворешните партнери на програмата за лојалност на компанијата.

Покрај собирањето бонитетни поени, т.н. „Keširići", програмата за лојалност на корисниците им ја овозможува и услугата „Селектор на попусти" (Selektor Popusta), со која преку апликација за мобилни телефони корисникот може самиот да ја креира листата на производи што ќе бидат на акција, односно да одбере 10 производи за кои ќе добие најмалку 10 отсто попуст во текот на месецот што претстои.

Трговскиот синџир „Гомекс" важи за еден од регионалните лидери во областа на трговија на големо и на малопродажба на стоки за широка потрошувачка, со 141 малопродажен објект, главно на територијата на Војводина.

Како што соопшти компанијата, при дизајнирањето на концептот и стратегијата за лојалност најголемиот предизвик било да создадат производ кој ќе направи потрошувачите да бидат мотивирани речиси со секое купување да остварат некаква корист.

Сакавме да го избегнеме сценариото на повеќето програми за лојалност на пазарот и да понудиме нова, персонализирана картичка, со унапредени функционалности, порачуваат од „Гомекс".

Идејата за „Селекторот на попусти"

Работејќи активно на развој и на одржување на програмите, бевме сведоци на еден тренд во FMCG-индустријата, кој укажуваше на постојано зголемување на учеството на купувањето акциски артикли во севкупното купување. Последица на сево ова е секојдневно нарушување на лојалноста кон брендовите и, од друга страна, засилување на лојалноста кон артиклите што се на акциски попусти, независно од брендот или од тоа што претпочита потрошувачот. Ако веќе не можеме да се извлечеме од овој вртлог на акциските намалувања, тогаш да се обидеме да им понудиме на купувачите самите да си одберат што сакаат да биде на акција и да се водат од тоа што навистина сакаат да го купат, а не исклучиво од акциската цена, објаснуваат во „Гомекс".

Корисниците на „Селекторот на попусти" можат да ги одберат своите 10 артикли од понуда од околу 2.000 артикли, кои за нив ќе бидат на попуст еден календарски месец откако ќе го направат изборот. По истекувањето на месецот, можат да ги заменат артиклите или да ги задржат. Суштината, велат во компанијата, е дека тие самите ја креираат акцијата, што води до „гејмификација" на процесот на купување и до зајакнување на перцепцијата на купувачите дека е многу подобро кога самите управуваат со своето, иако со сè поограничен буџет.

Доказ дека го направивме вистинскиот чекор е тоа што токму интернет-страницата на нашата програма, www.kasicabrojalica.rs, е еден од лауреатите на наградата „PC Press Top 50" во категоријата „eMarket". Образложувајќи ја одлуката, главниот уредник на списанието „PC", Дејан Ристановиќ, истакна дека не се работи за купување на интернет, но дека е, сепак, извонредно штедење преку интернет. Исто така, беше истакнато дека „Селекторот на попусти" е уникатен проект во Србија и дека вакво нешто првпат им се нуди на купувачите во малопродажбата, велат во „Гомекс".

Проектот „Селектор на попусти" почна да се спроведува во ноември минатата година. При создавањето на услугата, тимот што бил вклучен во работата ја зел предвид традиционалната особина на луѓето од овие простори секој да мисли дека може да биде селектор на националната репрезентација.

„Селектор на попусти" може да биде секој корисник на картичката „Kasica Brojalica", која се добива со пополнување пристапница во малопродажните објекти или на интернет-страницата на програмата за лојалност. По пополнувањето на пристапницата на интернет, корисниците ја добиваат картичката во период од околу две недели.

Предности за потрошувачите и за трговците

Каква е ползата од овој иновативен пакет за потрошувачите и за трговците?

Обработуваме повеќе податоци од што е потребно за релевантен примерок, што ни дава добра основа при донесувањето на нашите деловни одлуки. Кога имаме добар увид за тоа кој е тој што купува - демографски показатели, кога купува и што купува, полесно доаѓаме до одговорот на прашањето зошто купува и, соодветно на тоа, ги адаптираме сите активности за развивање на односите со потрошувачите. Така стигнуваме до крајната цел — зголемување на продажбата, објаснуваат во „Гомекс".

Врз основа на прибраните податоци, компанијата развила апликација за крајни корисници и два интернет-портали, за поврзување на бизнисите со потрошувачите (B2C) и за поврзување на бизнисите со бизнисите (B2B). Секој од тие 250.000 корисници има можност да пристапи бесплатно  до порталот, од каде што ќе може да следи сè што е поврзано со купувањето во „Гомекс" и во партнерските мрежи — од моментната состојба на бонитетни поени на неговата сметка и поединечни сметки на ниво на поединечни купени ставки, до листи со податоци од типот „10 најпродавани групи производи" и сума на вкупно потрошените износи за тие групи производи.

Неколку маркетинг-експерти нè советуваа дека податокот колку некој троши негативно влијае на неговото понатамошно трошење, но, во согласност со нашиот слоган „Кај нас знаете што купувате", идејата е токму со отворениот однос со потрошувачот долгорочно да развиваме однос на доверба, велат од компанијата.

Преку B2B-порталот, снабдувачите имаат увид во магацинската состојба и продажбата на нивните производи во малопродажната мрежа на „Гомекс", како и во сите други податоци поврзани со работењето. Покрај тоа, добиваат и специјализирани извештаи за тоа кои се нивните купувачи и какви се тие според нивните карактеристики и потрошувачки навики. Низ целиот процес, велат во „Гомекс", особено се внимава децидно да се почитува приватноста на потрошувачите, во согласност со законот, без откривање на какви било лични или контактни податоци на поединечните потрошувачи.

Оправданоста на ваквата стратегија ја покажуваат следните статистички показатели:

- Повеќе од 250.000 издадени картички;

- 81,7 отсто од вкупниот промет се евидентира преку картичките за лојалност;

- 67,2 отсто од вкупниот број фискални сметки содржат информација за картичката за лојалност;

- Близу 100 отсто активирани картички.

 



@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...