IN STORE in your country:
Makedonija   Slovenija   Hrvatska   Srbija   BiH  
Povratak na pocetnu stranu  
  Македонија Среда, 25.04.2018 || Domaine Lepovo Grand Cuvée светски шампион  |  Повторна продажба на имотот на компанијата „Малина“  |  „Хајнекен“ оствари солиден количински пораст  |  „Агрокор“ продолжува непречено да работи од 15 јули?  |  „П & Г“ презеде дел од портфолиото на „Мерк“ за 3,4 милијарди евра  |  „Гринјард“ бара снабдувачи во Македонија  |  „Сите сити“ - нов систем за донирање вишок храна  |  Медицинска опрема од „Жито лукс“ за четири болници  |  Во „Веро“ - Тафталиџе бесплатен паркинг 30 минути  |  „Млин и пекара Љубаче“ со нова инвестиција  |  Natur Premium пристигнува на македонскиот пазар  |  „Монделез“ вложува 90 милиони евра во „фабрика на иднината“  |  „Рамстор“ го отвори 25.маркет  |  „Хенкел“ отвори нова фабрика Somat во Крушевац  |  „Сан Пелегрино“ со приход од 895 милиони евра  |  „Карфур“ ги отвори првите пунктови испорака за пешаци  |  „Персу“ ги повика локалните производители да соработуваат  |  „Кимберли Кларк“ ќе го проширува капацитетот во Алабама  |  „Витамин“ на саемот во Мостар  |  Владимир Косијер нов генерален директор на „Пивара Скопје“  |   ||
   

Сашо Наумоски: Успешна 60-годишна приказна која продолжува

13.06.2016
 Приказната на „Витаминка" почна пред 60 години како компанија за мелен црвен пипер. Со континуираната бизнис-стратегија компанијата почна да раскажува приказна во која успешно се пласираат многубројни производи, од повеќе категории. Во моментов „Витаминка" присуствува на пазарите во 30 земји од светот, каде пласира 45 отсто од своето годишно производство. Сѐ зависи од менаџментот, како ќе се справите со проблемите и како секоја можност ќе ја претворите во успех, ни рече генералниот извршен директор на „Витаминка", Сашо Наумоски. Со него позборувавме за нивниот „Свет на вкусови", за развојниот пат на компанијата, стратегијата на работење во Македонија и во земјите од Јадранскиот Регион.

Разговараше: Алма Растодер, alma@instore.mk

Годинава прославувате 60 години постоење на „Витаминка". Колку е тежок патот до креирање успешен бренд на домашниот, но и на странските пазари?
Јас не би го употребил зборот тежок. Може да се каже дека тоа е пат полн со предизвици. Ако успеете да ги поминете, ќе можете да одите напред и да се развивате. Секој развој, секоја компанија во своето постоење има линија на пораст и, се разбира, на пад. Сѐ зависи од менаџментот, како ќе се справите со проблемите и како секоја можност ќе ја претворите во успех. Никој не очекувал дека пипераната од Прилеп ќе стане лидер во регионот во кондиторска индустрија, но гледате, денес пред вас има компанија што зад себе има 60-годишна историја на одлични одлуки, кои ја донесоа до оваа позиција. Јас многупати кажав и сега ќе повторам, „Витаминка" е пример како може компанија од Македонија да стане бренд надвор од границите на земјата, да биде пример за вистински развој.
Што сè е потребно за една компанија да опстои толку многу години? Можете да ги споредите почетоците од Вашето работење во компанијата со она што денес претставува „Витаминка"?
Континуитет е зборот што накусо ќе биде одговорот на ова ваше прашање. Треба да имате континуитет во одлуките и во спроведувањето на долгорочните планови.

Ако сте посветени на вашата мисија и визија, ако сте фокусирани на крајната цел, резултатите се неизбежни. Силата на една компанија лежи во нејзините вработени. Сите цели и стратегии ќе ви бидат залудни ако зад себе немате тим што ќе ги спроведе. 

Тој тим, пак, знае како да направи врвен производ и да ги исполни сите очекувања на потрошувачите кои изминативе децении се едуцирани, подготвени за нови производи, одат чекор понапред со своите желби. Тука, пак, се гледа иновативноста на една компанија, колку е таа подготвена да одговори на барањата на потрошувачите. 
 
Колкав е годишниот обем на производство и кои брендови учествуваат со најголем процент? Дали сте задоволни со искористеноста на вашите производствени капацитети?
Stobi Flips е дефинитивно лидер кај нашите производи, а по него следуваат Cevitana, Vitanez, Frutti, кечапот, Dafinka... Постојано го прошируваме производството, бидејќи сметаме дека простор за пораст има со отворање на новите пазари. Само последнава деценија имaме големи инвестиции во производството. Така, во 2007 година инвестиравме во нов погон за меки кекси. По него следуваше инвестицијата во производот Bonitas. Вложивме во целосно автоматско пакување на производствените погони. Тука е и инвестицијата за изградба на нов погон за чоколада со најсовремена опрема. Да не ги изоставиме ниту инвестициите во брендовите Despina, Frutti, Sirius, Sintagma и, секако, новиот изглед на Cevitana. Во согласност со нашата деловна политика за вложување во долгорочни проекти, издвоивме значајни средства за обновливи извори на енергија и за енергетска ефикасност. 

Каква е стратегијата при воведувањето на новите производи, како се одвива процесот од идеја до производство? Во која насока планирате да ја проширувате производствената програма?
Тоа е процес што го раководи нашиот оддел за истражување и за развој. Постојано ги следиме случувањата во нашата индустрија и правиме истражувања. Во согласност со податоците што ги добиваме, креираме план за развој и врз негова основа почнуваме со подготовка за пласирање нови производи. Секој нов чекор треба внимателно да се планира, пласирањето производ, сепак, е процес што трае. Развојот на новиот производ е стратегија што поминува низ многу анализи. 

Секој производ доаѓа како идеја, пред сè, од нашите оддели, бидејќи нашите вработени најдобро го познаваат пазарот. Со сегментација на идеите добиваме идеи за неколку производи. Со дополнителна дискусија го намалуваме бројот на идеи за производи. Потоа, следува и евалуација на производите според критериуми кои балансираат меѓу трошоците и подготвеноста на тимот за производство на ваков тип производ. Следуваат анализи на пазарот и на трговските синџири, потоа анализа на сегашната позиција на пазарот и на идните очекувања. Следува процес на тестирање и конечна одлука за лансирање нов производ. 

Досега имате направено редизајн на супите, чаевите, а минатата година и на Cevitana. Дали новиот изглед ја подобрува свесноста на потрошувачите за брендот и во која мера беа подобрени резултатите од продажбата на овие брендови? Што следно може да се очекува?

Секој производ поминува фаза на „подмладување". Тоа е потребно за да се биде во чекор со промените на пазарот. Едно од правилата на пазарот е дека ако успеете да бидете во чекор со промените, да бидете дел од нив, вашиот бизнис ќе се развива, но ако останете на истото, ќе има застој. Со тоа полека и ќе исчезнете од пазарот. Сите промени што ги направивме наидоа на одлична реакција кај потрошувачите. Сепак, тие промени се за нив, за оние кои чувствуваат дека се дел од приказната на „Витаминка". 

Засега „Витаминка" има воведено повеќе стандарди, еден од последните е и стандардот Халал. Дали тие ја поттикнуваат продажбата на производите на домашниот и на странските пазари? Кои се другите критериуми што треба да се реализираат за да се зголеми обемот на продажба?
Стандардите за квалитет се нешто без што ниту една компанија не може да функционира. За зголемување на обемот на продажба треба да имате развиено одлична стратегија за влез во сите пазари, каде, пак, треба да инвестирате за да ја подигнете свесноста за вашите производи и да вложувате многу. Може да го зголемите производството, но тоа треба да кореспондира со обемот на продажба. На домашниот пазар, иако имаме свесност за нашите производи, сепак треба многу да се вложи во комуникацијата, како потсетување зошто нашите производи се најдобри на пазарот. 

На кои сè пазари се присутни производите на „Витаминка"? Каква е извозната стратегија на компанијата за наредната година, дали можеби сте во преговори за пласирање на производите и на други светски пазари?
Следниот период сме насочени кон отворање на пазари на Блискиот Исток и во Австралија. Дури 45 отсто од нашето производство во моментов е наменето за странски пазари. Присутни сме на пазарите на 30-тина земји во Европа, како и во САД. 

Како ја оценувате минатата 2015 година од аспект на вашето работење и дали ги постигнавте очекуваните резултати? Кои се најчестите предизвици во работењето на македонскиот и на пазарите во регионот што треба да се решат што е можно поскоро?
Ова прашање многупати го поставуваат, но одговорот е едноставен – секоја компанија различно се справува со предизвиците и на домашниот и на странските пазари. Полесно за сите ќе биде ако заеднички се обидеме да ги решаваме сите проблеми, бидејќи на тој начин ефектот е поголем. Промената во управувачката структура подразбираше и поставување на надворешни лица во одборот на директори кои, сепак, компанијата ја гледаат од друг агол, однадвор. 

Во прехранбената индустрија предизвикот е да се понуди одличен квалитет по прифатлива цена. Тоа е нешто што нè води како компанија изминатите години и поради тоа имаме успех. 

Според Вашето мислење, дали во Македонија потрошувачите повеќе се поврзани со локалните компании и со нивните брендови? Како се борите со конкуренцијата?
Во Македонија потрошувачите се лојални на своите брендови, на оние на кои им веруваат. Конкуренцијата треба да се перципира само како начин да се оди понапред и како поттикнување за да бидете подобри. Нема потреба да се борите со конкуренцијата ако нудите одличен производ, со одличен квалитет, потрошувачите ќе го разберат тоа. На долг рок добива тој што нуди квалитет, а не тој што се обидува со трикови да стигне до потрошувачите за да добие краткорочна добивка. 

Кои се плановите на компанијата во поглед на работењето до крајот на 2016 година и дали може да ни дадете процена како ќе ја завршите годинава? Во која насока ќе продолжат понатамошните инвестиции?
Ќе одиме во позитивна нагорна линија. Тоа е нашата цел. А инвестициите нема да престанат, следува процес на осовременување и на автоматизирање на производството преку идни инвестиции во производството на грицки и кај чоколадната програма. 

„Витаминка" во регионот

Каква е моменталната позиција на „Витаминка" на пазарот во Србија?
„Витаминка" има долга традиција на продажба на српскиот пазар, кој важи за еден од нашите најголеми извозни пазари. Во Србија поседуваме сопствена фирма која се грижи за пласманот на нашиот асортиман повеќе од 12 години. Фирмата е комплетно екипирана за комерцијални и за маркетинг-активности. Логистиката, пак, ѝ ја доверивме на специјализирана фирма за логистички активности. Во оваа земја „Витаминка" има силна корпоративна препознатливост, како и јасно диференцирани брендови.

Која категорија производи/брендови се најзастапени на пазарот во БИХ и што новои специфично подготвува „Витаминка"?
На босанскиот пазар може да се најдат многу од нашите производи, но најпродавани брендови се: Atlantis, Choko stobi flips, Cevitana, чоколадни јајца Happy eggs и други.
Развојот на нови производи во принцип е наменет речиси за сите пазари. Но, доколку определен пазар бара одредени адаптации и приспособувања, го правиме и тоа, за да му излеземе во пресрет на крајниот потрошувач. Акцентот на пазарот во БИХ ќе го ставиме на специфични промотивни маркетинг-активности приспособени за пазарот.

Дали досегашното работење на хрватскиот пазар ги задоволува вашите очекувања? Како се борите со силната конкуренција на овој пазар? 
Можам да кажам дека во Хрватска работиме долго време и дека и таа е еден од нашите најголеми странски пазари. Сепак, и таму има голем потенцијал за поголем пласман и за зголемување на продажбата.

Хрватскиот пазар е специфичен зашто на него оперираат многу странски малопродажни компании. Таа претставува домашен пазар за најголемиот трговец во регионот „Конзум". Исто така, и домашните производители имаат многу силни брендови. Основната наша предност на овој пазар е добриот баланс меѓу квалитетот и цената.

Што сѐ досега е направено во поглед на позиционирањето на пазарот во Словенија? Како сте задоволни од соработката со трговските синџири и со вашите партнери?
Словенија има исклучително концентрирана малопродажба, од која практично само еден систем е домашен, а сите други се странски. Тоа го прави комплексен пласманот на овој пазар. Ние во Словенија извезуваме многу. Порано, беа доминантни приватни марки. Последниве две-три години почнавме да го зголемуваме уделот на нашите оригинални брендови на словенечкиот пазар.

Во Словенија имаме партнери и одлична соработка со нив. Со оглед на нивната позиција, од нив може да се научи многу, а знаењето да се искористи и за другите пазари.








 
 
 
 
back to top