IN STORE in your country:
Makedonija   Slovenija   Hrvatska   Srbija   BiH  
Povratak na pocetnu stranu  
  Македонија Сабота, 20.10.2018 || Тридневна дружба на вработените на „Макпрогрес“  |  „Лакталис“ го купува „Нестле“ во Малезија за 40 милиони долари   |  Трговците избраа ТОП 100 производи  |  Милијардер купи удел во Starbucks  |  Перутнина Птуј“ ќе продава салами во САД   |  „Метро Бугарија“ воведува автентични млечни продукти  |  Сертификати за компаниите што се фер со потрошувачите  |  „Унилевер“ нема да се сели во Холандија   |  Трговците бираат топ 100 производи   |  Битола стана дел од големиот проект „Coca-Cola Активни зони“   |  Производителите на чоколадо се насочуваат кон Исток   |  Трошоците на живот на месечно ниво намалени, на годишно имаат раст   |  Расте добивката на „ПепсиКо“   |  „Нестле“ е заинтересиран да купи бренд за минерална вода  |  Германските трговци продаваат преку интернет   |  Нов „Стокомак“ во Тетово  |  Експресна услуга на нова локација во Струга  |   Увозот на храна расте побрзо од извозот   |  Во септември пад на светските цени на храната   |  „Фуд стар“ ќе извезува пилешко месо во Кина   |   ||
   

Никола Јовановиќ: Истражувај сам

15.10.2015
 

Постојат некои маркетинг-техники што не бараат многу и не е потребно да ангажирате истражувачка агенција за да спроведете мало истражување. Една од тие техники „направи сам" е опсервацијата.

Автор: Никола Јовановиќ, директор „Плам марк"

Отворањето продавница, почетокот со работа во трговијата, како и почнувањето со која било работа е голем чекор. Секој од нас се обидува да ги предвиди сите потенцијални замки на новиот бизнис, сите закани од околината да се сведат на минимум и користејќи ги сопствените сили, да искористи добар почеток и со полн гас да влезе во светот на претприемачите.

Изборот на локацијата на трговскиот објект, ако не е најважна, секако е една од најважните три одлуки, која значително ќе влијае на вашето работење. Затоа би било идеално секој пред изнајмувањето или купувањето на локалот, користејќи некои од техниките за маркетинг-истражување, да го испита пазарниот потенцијал и на тој начин да го намали ризикот за успешно работење.

Набљудување

Сепак, некои маркетинг-техники не бараат многу и за нив не треба да се ангажира истражувачка агенција за спроведување мало истражување. Една од тие техники „направи сам" (или како што би ја нарекол техника „истражувај сам") е опсервацијата. Според дефиниција, опсервацијаили набљудување е собирање податоци преку непосредно сетилно забележување.

Го знаете тоа кога ќе речеме Лично слушнав... или Видов со свои очи, или пак: Го пробав тоа, сè уште го чувствувам вкусот на моите усни... Доживувањето на појавите од околината со сопствените сетила значително придонесува да формираме поцврсти ставови за тие појави, отколку кога информацијата ја примаме од втора рака.

Опсерваторните истражувања во голема мера се наменети за постоечките малопродажни објекти, кои имаат можност за ширење на работата и за отворање продавници на нова локација, како и за оние што сакаат да ја отворат првата трговска продавница. Текстот е наменет и за тие што не сакаат да отворат нов трговски објект, туку само сакаат подобро да разберат одреден пазар, неговата големина и однесување.

Опсервацијата или набљудувањето, броењето, нотирањето, е честопати занемарена маркетиншка и истражувачка методологија, која дава одлични резултати за подобро разбирање на целната група. А најчесто за малите трговци не е потребно речиси никакво материјално вложување, туку само време.

Вложете време

Ако сте подготвени да го вложите својот најзначаен ресурс – времето, ви предлагам вашето опсервациско истражување да се состои од три дела:

 

  1. Броење минувачи на локацијата на која планирате да отворите продавници;
  2. Броење купувачи на конкурентските објекти;
  3. Броење живеалишта во дијаметар од 1.000 метри.

Броење минувачи на локација каде планирате да отворите продавница, за да го измерите пазарниот потенцијал на тоа место

На локацијата што е предмет на интерес и каде сакаме да отвориме продажен објект, го броиме протекот на пешаци, велосипедисти и на автомобили. Тоа го правиме барем четири дена во неделата (идеално би било сите седум) во две смени од шест часа, два работни дена и два дена во викендот – го мериме пазарниот потенцијал на локацијата, за да видиме колку луѓе поминуваат покрај местото каде сакаме да отвориме продавница. На тој начин, набљудувајќи го типичното однесување на минувачите во текот на работните денови и за викендите, може да го разбереме типичното однесување во набљудуваната локација – колку луѓе поминуваат тука, на кој начин, во кое време од денот. Значајно е да се води сметка набљудувањето да се врши во временски момент, кој е типичен и може да претставува пресек на посетите во текот на целата година. Како што знаеме, постојат делови од годината кога однесувањето на граѓаните е атипично – за време на верски и на државни празници, учениците за време на летниот распуст итн.

Кога имаме податоци за четири типични денови, изброените пешаци, велосипедисти и автомобили, ги множиме со седум и го добиваме волуменот на однесување во текот на еден месец квантитативно, како пазарен потенцијал на локацијата, и квалитативно, на кој начин се одвива прометот пред објектот, дали и во која мера се разликува однесувањето за време на викендите и во работните денови.

Броење купувачи во конкурентскиот објект за да се измери силата на најголемиот конкурент

Опколени сме со конкуренти и мала е шансата дека нашиот нов објект ќе биде прв во тој дел од градот (населбата). Ако е прв, тогаш треба да се прашаме зошто е тоа така пред да почнеме да планираме и да вложуваме во отворање на продавницата. Сепак, веројатно е дека ќе имаме конкуренција во близина на локацијата каде ја планираме новата продавница. Тоа е добра можност со следниот чекор во истражувањето да дознаеме повеќе детали за нашата целна популација.

Истражувањето пред конкурентниот објект (го избираме најзначајниот конкурент), што, според методологијата, е слично со набљудувањето на протекот на пешаци пред нашиот објект, е своевиден „мистери шопинг" (мистериозен купувач или попрецизно мистериозен набљудувач). Никој не може да ни забрани да стоиме и да правиме тоа што сакаме на пропишана оддалеченост од конкурентската продавница (50 метри). Сепак, треба да се биде внимателен, да се одржува таа оддалеченост и да се зафати место со добар поглед на влезот од конкурентскиот објект, бидејќи никој не сака индустриска шпионажа, а ова истражување е тоа во одреден момент.

Методологијата е иста како и во претходниот дел од истражувањето: набљудуваме, броиме и запишуваме колку пешаци, автомобили и велосипедисти поминале пред конкурентската продавница, но овде ги прошируваме целите и го додаваме бројот на луѓе што влегуваат во објектот. Дополнително може да се забележи дали се мажи или жени, дали ги водат со себе и децата... На овој начин значително придонесуваме за квалитет на добиените податоци, што подоцна ќе ги искористиме на вистинскиот начин.

Броење живеалишта во дијаметар од 1.000 метри за да се измери вкупниот пазарен потенцијал

Во дијаметар од 1.000 метри околу саканата локација на нашата продавница, ги броиме становите и куќите за да го одредиме вкупниот пазарен потенцијал на локацијата – колку луѓе живеат, а кои реално може да ги привлечеме да бидат наши купувачи. Упатството е јасно: да направиме мапа со зацртан круг во дијаметар од 1.000 метри, да одиме од улица во улица и да ги броиме становите. Во зградите влегуваме на приземје и гледаме колку сандачиња има, а кога се во прашање куќите, еден кат го сметаме за еден стан.

Понатаму пресметката е јасна – просечно во еден стан живее едно семејство со 3,5 членови, ги множиме податоците и го добиваме вкупниот потенцијал. Разбирањето на местото каде живеат нашите идни потрошувачи, може многу да ни помогне во определувањето на идните промотивни акции.

Така, имаме три вида податоци – протек на луѓе во нашата локација, протек на луѓе во конкурентската локација и дополнителни информации за неговите купувачи. На крајот, тоа е вкупниот потенцијал на нашиот пазар. Тоа е доволно за темелна анализа која ќе ни даде одговор на прашањето дали да отвориме продавница на таа локација. Ако одговорот е да, ќе добиеме одговор на прашањето колкав е бројот на луѓето што ќе бидат наши купувачи, каде тие живеат и како да им пристапиме во комуникацијата, колкав е вкупниот промет што може да го очекуваме итн.


 
 
 
 
back to top