IN STORE in your country:
Makedonija   Slovenija   Hrvatska   Srbija   BiH  
Povratak na pocetnu stranu  
  Македонија Среда, 18.07.2018 || Добивката на „Плантаже“ изнесува 2,4 милиони евра  |  „Ошан“ воведе гласовен четбот за вино и храна  |  Нова франшизна продавница „Шпар партнер“  |  Специјално пиво по повод средбата Трамп-Путин  |  Доделени првите грантови за домашни компании  |  „Карлсберг“ отвора нова пиварница  |  Кинези ќе градат индустриски парк за овошје и зеленчук  |  Нов ИнфоЛогистички центар во Љубљана  |  „Велпро“ ќе ги поддржува малите трговци  |  Белград стана побогат за уште еден dm  |  Резултатите на „Пепсико“ се подобри од очекуваните  |  Кратошија меѓу најдобрите вина на британскиот пазар   |  „Интермарше“ за постари лица  |  Повисоки трошоци за живот и малопродажни цени во јуни  |  „Бимилк“ подари ново место за спорт и рекреација  |  „Унилевер“ го купи бугарскиот бренд сладоледи Denny  |  „Нилсен“ именуваше нов раководител за Јадранскиот Регион  |  „Макпрогрес“ на „Summer Fancy Food Show“  |  „Перно Рикар“ ќе дистрибуира безалкохолен џин  |  Продажба на алкохолни пијалаци во секое време  |   ||
   

Андреј Беле: Потешко е да се остане, отколку да се стане лидер

22.06.2015
 
 Андреј Беле, генерален директор на стратешкото работно подрачје Кафе во „Атлантик група"

Со 18,24% удел во вкупните приходи од продажбата на „Атлантик група" во првиот квартал од 2015 година, кафето се истакнува како најголема поединечна категорија, со 31,5 милиони приход од продажба. Исто така, порастот од 3,1% во голема мера придонесе за вкупниот пораст на приходите. Кое беше пресудното влијание за овој одличен деловен резултат, со кои проблеми компанијата се соочуваше на пазарите во регионот, дали Србите повеќе сакаат инстант или турско кафе... се некои од прашањата, на кои за InStore ги даде одговорите Андреј Беле, генералниот директор на стратешкото работно подрачје Кафе во „Атлантик група".

Разговараа: Ана Филиповиќ, ana@instore.rs и Милица Петровиќ, milica@instore.rs

Со 18,24% удел во вкупните приходи од продажбата на „Атлантик група" во првиот квартал од 2015 година, кафето се истакнува како најголема поединечна категорија, со 31,5 милиони приход од продажба. Исто така, порастот од 3,1% во голема мера придонесе за вкупниот пораст на приходите. Кое беше пресудното влијание за овој одличен деловен резултат, со кои проблеми компанијата се соочуваше на пазарите во регионот, дали Србите повеќе сакаат инстант или турско кафе... се некои од прашањата, на кои за InStore ги даде одговорите Андреј Беле, генералниот директор на стратешкото работно подрачје Кафе во „Атлантик група".

Дали пазарот на кафе во Србија е стабилен или пак постојат проблеми на нелојална конкуренција и сива економија? Што треба да се промени за категоријата да биде потранспарентна за потрошувачот и попрофитабилна за државата?

Пазарот во Србија е потполно поинаков од другите пазари во регионот. Како регионален водечки производител на кафе, ја почнавме иницијативата за воведување на акцизни маркички, поради тоа што другата акцизна стока (цигарите и алкохолните пијалаци) има маркички, а кафето не. Тоа не би влијаело на малопродажната цена на производите, бидејќи ние како сериозни производители, односно увозници, плаќаме акциза и царина, а акцизната маркичка би била само потврда дека сите давачки при увоз и за пуштање на производите во промет се исплатени.

Овде би го нагласил и неуредното декларирање. При контрола во нашите лаборатории, но и во надворешните, во последно време забележуваме сè поголема присутност на одредени сурогати, кои не се декларирани. Интензивно работиме на тоа и сакаме да биде средено.

Како „Атлантик група", односно „Гранд пром", за буџетот на Србија годишно плаќаме повеќе од 11 милиони евра на сметка на акцизите и царината. И не бараме ништо друго, освен државата да нè заштити. Тоа е единствениот начин за воведување ред на пазарот.

Исто така, ние сме компанија што ги исполнува сите потребни стандарди, а за тоа се потребни одредени вложувања. На некој начин, тоа е одговорот зошто нашите брендови имаат вистински баланс меѓу цената и квалитетот. Користиме најквалитетни суровини, ги почитуваме сите стандарди и правила на работење во опкружувањето каде што работиме.

Колку флуктуацијата на цените на глобалниот пазар може да влијае на крајниот потрошувач?

Кафето е берзански производ, а она со што се тргува на берза е подложно на промени, кои се предизвикани од реални показатели, но понекогаш е подложно и на одредени шпекулации. Исто така, кафето е подложно и на климатски промени. Она што е најважно, е тоа што 80% од нашата арабика доаѓа од Бразил.

Ако ме прашувате дали ова влијае на нас, одговорот гласи да. Кога ја споредуваме цената на влезното сурово кафе, за нас ниту една година не е иста како и претходната. Во овој период работиме со цена на суровото кафе која е повисока за 30% во однос на минатогодишниот период. Сепак, тие повисоки цени на увозните суровини не ги пренесуваме на крајниот потрошувач.

Нашиот систем на набавка најчесто се темели на принципот купување според потеклото, а не според местото. Купувањето според потеклото значи дека нашите луѓе одат во Бразил секоја година. На чело на тимот е магистер Крешо Марин, кој директно од плантажерите ги одбира видовите плодови со ниво на квалитет што нам ни е потребен. Купувањето според местото се одвива на пристаништата во околината. Важно е да се потенцира дека 80% од нашето кафе е купено според првиот принцип. Од тоа, 60% од кафето го купуваме во Бразил, а другите 40% во земјите на Јужна Америка, Азија и Африка.

Првата фаза на купување кафе според потеклото е обиколување на плантажите во период кога бербата е при крај и кога се знае какво ќе биде зрното. Таму се прави првата проба. По обиколката на плантажите и утврдувањето на квалитетот на новата берба, вториот дел од посетата се состои од обиколка на извозниците на кафе, со кои се договараат комерцијалните услови. Патот продолжува кон Рио, каде што во т.н. „куќа на кафето" претставници од фармерите официјално го претставуваат количеството, вредноста и квалитетот на суровото кафе што ќе се најде на пазарот. Овде се прави втората проба. Врз основа на  одбрани примероци, почнува тргувањето, односно подготовките за испорака. Третата проба се прави непосредно пред кафето да се товари на бродовите. Кога ќе стигне на пристаништето Копер, пред да се товари на камионите за Белград, се прави четвртата проба. На тој начин доаѓа до минимизирање на можноста од една страна да се испорача, а од друга да се преземе неквалитетен плод. По завршувањето на патот на суровото кафе, тоа влегува во процесот на производство. Кафето се контролира пред да влезе во тој процес и на крај, се контролира и готовиот производ. Особено сме горди на тој пат на кафето.

Колку сегментот кафе е важен за „Атлантик група"? Каде сè имате производни погони во регионот?

Стратешкото работно подрачје Кафе е најголемото во рамките на „Атлантик група". Нашиот удел во целокупните приходи е на ниво од 19%. Во Ледине е нашата најголема пржилница, каде што ги произведуваме брендовите Grand Gold, Grand Aroma, Grand Deluxe, Bonito, а од пред еден месец и Grand Black & Easy. Тука го пакуваме и инстант-кафето за регионот на Србија и мал дел за Црна Гора, а оттука тргнува и целиот извоз на традиционално кафе за пазарите на ЕУ, САД и Канада.

Втората по големина пржилница е во Изола, Словенија, каде што произведуваме Barcaffe за словенечкиот и за хрватскиот пазар, пакуваме инстант-кафе, од пред неколку денови и Barcaffe Black & Easy, ги подготвуваме трите рецептури за Barcaffe esspreso. Третата по големина е пржилницата во местото Главчице, кај Биелина во Република Српска. Таму исто така се произведува Grand Gold, Grand Aroma, Bonito. Тоа е една мала пржилница со триесетина вработени, која го снабдува подрачјето на БиХ. И четвртата, слична со онаа во БиХ е пржилницата во Скопје, каде што се произведуваат Grand Gold, Grand Aroma, Grand Deluxe, Kafa C и Minas за Македонија, а дел од производите од овде ги извезуваме на црногорскиот пазар.

Вкупно годишно производство е од 24.000 до 25.000. Првиот наш конкурент годишно произведува од 13.000 до 14.000 тони.

Каква е силата на одделни брендови во регионот?

Barcaffe има 45-годишна традиција во Словенија и годинава го прославивме роденденот на 8 мај. Држи неприкосновен удел на пазарот, кој надминува 75%. Во Хрватска забележавме 13,4% пазарен удел во последниот квартал. Овде почнавме пред 4-5 години со удел од скромни 4%. Што се однесува до брендот Barcaffe esspreso, без оглед на неговата силина, многу работиме на него, бидејќи потешко е да се задржи лидерската позиција со години, отколку да се стигне до неа.

Grand има традиција долга 17 години. Една мала пржилница е производител на водечките брендови во Србија, Македонија и БиХ, со водечкиот бренд Grand Gold. Тој се произведува со топло мелење и на тој начин ги дава препознатливите мирис и вкус, кои ги истакнуваме преку рекламните кампањи. Grand Gold е наменет за популацијата 45+, за разлика од Grand Aroma, за кој сметаме дека е за помладите генерации. Bonito го сместуваме во, не би сакал да го наречам економски сегмент, туку повеќе оди кон медиум сегментот. Grand Deluxe е кафето со најдобар квалитет. Инстант-кафето во Србија е во експанзија. Денес произведуваме 559 тони инстант во Србија, од вкупно 784, што во 2014 година во однос на две години порано претставуваше пораст од 20%. Инстант-кафето, кое две години по ред растеше многу брзо, и понатаму расте, но со намалено темпо.

Пазарот во БиХ е специфичен, од една страна поради географската положба, а од друга поради големиот број на мали пржилници. На тој пазар, водечки бренд е Grand Gold, втор е Grand Aroma, а трет Bonito. Во Македонија имаме уште два бренда, а тоа се Minas и Kafa C, кои се доминантни во една погранична област, додека во централниот дел водечките брендови се Grand Gold и Grand Aroma.

Неодамна го пласиравте и Grand Black & Easy. Како дојдовте до идејата?

Размислувајќи за она што можеме да им го понудиме на нашите потрошувачи од регионот, се роди идејата за производот што на пазарот го лансиравме пред еден месец. Тоа е Grand Black & Easy, односно во Словенија Barcaffe Black & Easy. За среќа полека, но категоријата традиционално кафе опаѓа поради сè побрзиот начин на живеење и недостигот од време. Од друга страна, токму тоа придонесе за развој на новиот производ. Така, Barcaffe Black & Easy го нарековме „Турско кафе за практична подготовка" – тоа не е инстант-кафе, туку турско што се подготвува брзо. Од идејата до почетокот на продажбата поминаа помалку од 10 месеци, а производот е исклучиво наш – го создаде нашиот тим. На тој начин покажавме дека сме компанија што може да ги диктира и новите трендови.

Подготвуваме уште два нови концепта. Се надевам дека барем еден од нив ќе се појави на пазарот до крајот на годинава. Не би сакал да зборувам многу околу тоа, но ќе кажам дека тоа го нема во Европа. Сигурен сум дека по првата револуција со кафето Barcaffe Black & Easy, ова ќе биде револуција број два. Продажните резултати сведочат за успехот на првата револуција. За помалку од еден месец на пазарот, многу сме задоволни од продажбата во Србија, во Словенија таа почна подоцна, а наскоро би требало да почне и во БиХ и во Македонија – потоа продолжуваме понатаму.

Колку иновациите се значајни за вашето работење и колку вложувате во нив?

Ние сме една од ретките компании, која секоја година вложува и во т.н. развоен буџет, кој е наменет за иновации. Во тој развој понекогаш сме можеле да бидеме и похрабри. На пример, во Словенија го лансиравме Barcaffe selection, 100% арабика за домашна употреба. Со тоа кафе влеговме и во Хрватска, со помали количества. Во двете земји беше добро прифатено, но мислам дека е прерано ова премиум кафе да се најде и на српските полици, па затоа на тој пазар правиме други екстензии.

Колку вложувањата во истражувања ѝ помагаат на лидерската позиција и на вистинските деловни одлуки? Со кои истражувачки куќи соработувате во Србија?

Користиме внатрешни и надворешни истражувања и многу вложуваме во нив. Знаеме кој ги следи трговците – тоа е „Нилсен", работиме и со „Ипсос", „ГфК" и др. Би нагласил дека резултатите од земја до земја не се изедначени. Во одредени земји имаме предизвици при следењето на податоците. На пример, во Србија знаеме дека односот модерни-традиционални продавници е 50:50, или поточно 60:40 во корист на традиционалните. Во ТТ-каналот има продавници со големина од 2 на 2 квадратни метри, до оние што ги нарекуваме „носители на прометот". Токму ТТ-каналот се базира на наши проценки, а во истражувањата не влегуваат пазарите, киосците и некои други важни формати. Мислам дека токму овде е проблемот, а не би рекол дека е до квалитетот на податоците. Истражувачките куќи ги испорачуваат податоците до кои доаѓаат врз основа на проверени методи. Ние ги купуваме истражувањата за сите земји, освен за Македонија – таму недостасуваат. Понекогаш на моите луѓе дури им велам дека имаме премногу истражувања и дека мора внимателно да ги анализираме и максимално да извлечеме и научиме од нив. Од друга страна, не можеме без тие истражувања. Толку е големо портфолиото на „Атлантик група", и производно и дистрибутивно, така што без нив не би можеле.

Лидер сте во огласувањето, а за тоа доказ се и признанијата на УЕПС од претходната година. Какво влијание на продажбата имаа наградените кампањи?

Секоја награда за кампања или какво било признание се доказ дека си забележан и има влијание на продажбата. Она на што особено сме горди е признанието на УЕПС од минатата година, но горди сме и кога предминатата година ги освоивме сите поголеми награди на „Ноќи рекламождера". Добивме четири признанија од областа на пазарната комуникација и златно признание за интегралната кампања „Гледам сигурна добивка", како и признанија за многу други кампањи.

Дали ве изненади одѕивот на кампањата „Гледам сигурна добивка"?

„Гледам сигурна добивка" е програма за лојалност, направена во последниот квартал од минатата година. До идејата дојдовме поради тоа што во Србија да се организира наградна игра, а притоа да не се прекрши законот, е речиси невозможна мисија. Затоа, од идејата за наградна игра настана програмата за лојалност. Ова е продолжение на активноста „Кафеманија" од Словенија. Во Србија се поврзавме со „Металац" и заедно проценивме дека ќе поделиме 100.000 подароци. На крај поделивме 144.000 подароци, што беше доволен поттик програмата да ја продолжиме и во БиХ. Од 1 јули во Македонија ќе почне голема наградна игра.

Кои се најчестите типови потрошувачи во Србија? Колку од нив се традиционални, а колку иновативни во навиките на пиење кафе?

Потрошувачот во Србија е многу верен, тој препознава квалитет, ја цени традицијата на пиење кафе. Grand е лидер во Србија веќе 17 години и секој ден се пијат по 4,5 милиони шолји кафе. Во целиот регион кафето Grand е присутно во повеќе од два милиона домови и се консумира секој ден и во текот на целиот ден.

Потрошувачот во регионот бара многу и не смееме да дозволиме да се почувствува измамен. Затоа постојано работиме на иновации. Ако зборуваме за цените при воведување на акцизните маркички, тој не смее да го почувствува тоа – до него мора да дојде информацијата дека од една страна, се работи за заштита на квалитетот, а од друга се заштитува и тој како потрошувач.

Дали постојат разлики во навиките на потрошувачите кога е во прашање консумацијата на кафе во земјите од регионот?

Регионот е сличен по потрошувачката на турското кафе. Ако ги погледнеме  податоците за потрошувачката на инстант-кафе во Словенија, Србија, БиХ и во Македонија, таа се движи од 5,2 до 5,8 килограми по глава на жител. Втора работа е што инстант-кафето побрзо расте во Србија, иако подоцна се појави на пазарот. Словенија и Хрватска се многу силни во поглед на оваа поткатегорија. Тоа што е интересно за консумацијата на традиционалното кафе во Србија, во споредба со петте земји од регионот, е дека тоа многу се консумира во хорека-секторот. Што се однесува до потрошувачите, тие на овие пазари не се разликуваат многу.


 
 
 
 
back to top